Շնորհավոր անկախության օր

ՇՆՈՐՀԱՎՈՐ ՏՈՆԴ      ՀԱՅԱՍՏԱՆ   

Շնորհավորում եմ բոլորիս Հայաստանի Հանրապետության անկախության տոնի կապակցությամբ։

Սեպտեմբերի 21-ը պատմական ու հիշարժան օր է համայն հայության կյանքում. 1991թ.  այս օրը Խորհրդային Հայաստանի քաղաքացիները պատմական որոշում կայացրեցին` անկախությունն ընտրելով որպես միակ հնարավոր կարգավիճակ և երկրի հետագա զարգացման անշեղ ուղի:
Արդեն 27 տարի հայ ժողովուրդն առաջ է ընթանում` հաղթահարելով բազմաթիվ դժվարություններ և կերտելով հաղթանակներ:

Մեր երկրի ապագան ու անվտանգությունը, ապահովությունն ու բարեկեցությունը պայմանավորված է յուրաքանչյուրիս ներդրած ջանքերով, ուստի մաղթում եմ, որ համախմբված միասնակամությամբ կարողանանք կերտել մեր երազների երկիրը:
Մեզ անհրաժեշտ է հուսալի պաշտպանություն, խաղաղ աշխատանք և   կայուն զարգացում:
Ես վստահ եմ, որ մենք ազգովի հասնելու ենք այդ վսեմ նպատակներին: 

Կրկին ջերմորեն շնորհավորում եմ ՀՀ անկախության 27-ամյակի կապակցությամբ և մաղթում խաղաղություն ու բարօրություն։

 Վանաձորի  № 4 հիմնական դպրոցի

տնօրեն՝ Համլետ Խումարյան

ՀԱՄԱՊԵՏԱԿԱՆ ՇԱԲԱԹՕՐՅԱԿԸ ՎԱՆԱՁՈՐԻ N4 ԴՊՐՈՑՈՒՄ

ՀԱՄԱՊԵՏԱԿԱՆ ՇԱԲԱԹՕՐՅԱԿ

2018 Թ.

Աշակերտների մեջ շրջակա միջավայրի նկատմամբ հոգատար և բարեխիղճ վերաբերմունքի սերմանման շարունակական գործի լավագույն դրսևորումներից էր 08.09.2018թ. կազմակերպված համապետական շաբաթօրյակը, որին ակտիվ մասնակցություն ցուցաբերեցին 7-9-րդ դասարանի աշակերտները՝ դասղեկների հետ միասին՝ ապահովելով դպրոցի բակի և շրջակայքի մաքրությունը:                   

Այն ևս մեկ քայլ էր՝ ուղղված երեխաների էկոլոգիական և գեղագիտական դաստիարակության մակարդակի բարձրացման, ինչպես նաև նրանց անձի համակողմանի և ներդաշնակ զարգացման գործին:

                         

   

                                 

  

                                            

                               

    

                               

                            

      

                           

      

                

ՇՆՈՐՀԱՎՈՐ ՍԵՊՏԵՄԲԵՐԻ 1

                 ՇՆՈՐՀԱՎՈՐ  ԳԻՏԵԼԻՔԻ

ԵՎ  ԴՊՐՈՒԹՅԱՆ 

ՕՐ

2018 թ-ի սեպտեմբերի 1-ին կրկին մարդաշատ էր ՀՀ Լոռու մարզի Վանաձորի Ա. Պուշկինի անվան № 4 հիմնական դպրոցի բակը: Ահա և մեկնարկեց 2018-2019 ուսումնական տարին, որին սրտի տրոփյունով էին սպասել թե´ կրթօջախ առաջին անգամ ոտք դնող 122 աշակերտները, թե´ նրանց ծնողները: 

«Հարգելի´ հյուրեր, գործընկերներ, ծնողներ, սիրելի աշակերտներ,
Վանաձորի Պուշկինի անվան N4 հիմնական դպրոցը կրկին իր գիրկն է հրավիրում սիրելի սաներին: Հուսով եմ, ամառային արձակուրդը ծառայեցրել եք բովանդակալից ու լիարժեք հանգստին և հարազատ կրթօջախ եք վերադարձել ուժ ու կորով ամբարած, կենսական ավյուն կուտակած և պատրաստ եք հաստատուն քայլերով շարունակել գիտության քառուղիներով ու ոլորաններով ընթացող հետաքրքիր վերելքը:

Իմ և մեր մանկավարժների անունից վստահեցնում եմ, որ մենք ամեն հնարավորն արել ենք մեր աշակերտների կրթադաստիարակչական գործընթացը անհրաժեշտ մակարդակով, բարձր որակով և ժամանակի ոգուն համապատասխան կազմակերպելու: Այսօր խոսքս ընդհանուր հանդիսատեսին դիմելով չեմ կարող սահմանափակել, քանի որ օրվա գլխավոր հերոսները, կարծում եմ բոլորդ էլ համամիտ կլինեք, մեր փոքրիկներն են, մեր նորելուկ առաջին դասարանցիները: 
        Սիրելի´ փոքրիկներ, սիրով ենք ընդունում ձեզ մեր կրթօջախ: Այս նշանավոր ուղի անցած կրթօջախը ձեզ համար ևս կդառնա ջերմ ու հարազատ հարկ, ուր պատրաստ են և´ կրթել ձեզ, և´ բազմակողմանի զարգացնել, և´ ինչու չէ սովորեցնել մարդագիտության ոչ պակաս կարևոր այբուբենը: 

Դուք նվիրյալ ընկերներ կգտնեք և´ մանկավարժների, և´ դասընկերների, և´ ընդհանրապես դպրոցի ողջ աշխատակազմի մեջ: Շրջապատված կլինեք հոգատարությամբ, կդառնաք խոհեմ ու լրջամիտ, բարեկիրթ ու պատվախնդիր հայ պատանիներ` ազատ, առողջ, ինքնուրույն մտածելակերպով:

Բարի գալուստ, սիրելի´ փոքրիկներ:

Սիրելի´ հանդիսատես, ևս մեկ անգամ սրտանց շնորհավորում եմ բոլորիս` գիտելիքի և դպրության օրվա` 2018-2019 ուսումնական տարվա մեկնարկի առթիվ: Մաղթում եմ հետաքրքիր, բովանդակալից, բազմաբնույթ առօրյայով հագեցած աշխատանքային տարի, լի նոր նվաճումներով, նոր հաղթանակներով, ի փառս մեր դպրոցի, մեր քաղաքի և Հայաստանի Հանրապետության»:

Վանաձորի № 4 հիմնական դպրոցի տնօրեն՝
Համլետ Խումարյան