ՇՆՈՐՀԱՎՈ՛Ր ՏՈՆԴ, ՀԱՅՈ՛Ց ԲԱՆԱԿ
Սիրելի՛ հայրենակիցներ, սրտանց շնորհավորում եմ բոլորիդ Հայոց բանակի կազմավորման 26-րդ տարեդարձի առթիվ: Սա հիրավի համազգային տոն է, քանզի հզոր ու մարտական բանակն է մեր անկախ պետականության գրավականը: Ցանկանում եմ հատուկ շնորհավորել մեր երկրի սահմաններն անձնվիրաբար պահող մեր զինվորներին: Ձեր նվիրումի և աննկուն կամքի շնորհիվ Դուք անառիկ եք պահում մեր երկրի սահմանները՝ չերկնչելով թշնամուց և հաճախ վտանգելով սեփական կյանքը: Ձեր հայրենասիրությունն ու խիզախությունն ապացույցն են այն բանի, որ ռազմահայրենասիրական դաստիարակությունը շատ բարձր մակարդակի վրա է դրված մեր դպրոցներում: Փառք ու պատիվ Ձեզ, Ձեզ ծնած հայ մայրերին և Ձեզ կրթած մեր ուսուցիչներին: Խաղաղ և անփորձանք ծառայություն Ձեզ բոլորիդ: Եվ հավերժ հիշատակ ու խոնարհում հանուն հայ ազգի ընկած մեր քաջ հերոսներին: